Commonwealth irasabwa kurenga imikino igashyira imbere ubucuruzi n’ishoramari

Minisitiri w’Intebe wa Antigua na Barbuda, Gaston Browne, yanditse ko Commonwealth idakwiye kugaragara gusa igihe habaye Imikino ya Commonwealth, ahubwo ikwiye kuba urubuga rwo guteza imbere ubucuruzi, ishoramari n’imirimo ku baturage b’ibihugu biyigize. Uyu munsi i Glasgow muri Scotland hatangiye kongera guhura ibihugu bigize Commonwealth, aho abakinnyi n’abafana baturutse mu bihugu 56 bazitabira imikino imara ibyumweru bibiri. Nubwo imikino izakurura amaso ya benshi, cyane cyane nyuma y’uko abakinnyi b’Abanyafurika bigaragaje mu marushanwa akomeye nka London Marathon, Gaston Browne avuga k

Minisitiri w’Intebe wa Antigua na Barbuda, Gaston Browne, yanditse ko Commonwealth idakwiye kugaragara gusa igihe habaye Imikino ya Commonwealth, ahubwo ikwiye kuba urubuga rwo guteza imbere ubucuruzi, ishoramari n’imirimo ku baturage b’ibihugu biyigize. Uyu munsi i Glasgow muri Scotland hatangiye kongera guhura ibihugu bigize Commonwealth, aho abakinnyi n’abafana baturutse mu bihugu 56 bazitabira imikino imara ibyumweru bibiri. Nubwo imikino izakurura amaso ya benshi, cyane cyane nyuma y’uko abakinnyi b’Abanyafurika bigaragaje mu marushanwa akomeye nka London Marathon, Gaston Browne avuga ko igihembo gikomeye kurusha imidali ari ubushobozi bwa Commonwealth bwo guhuza ubukungu bw’ibihugu biyigize. Yagaragaje ko Commonwealth ifite amahirwe akomeye kuko ihuza abantu miliyari 2.7 ku migabane yose ituwe, ikagira ururimi rumwe mu bihugu byinshi, amategeko n’imikorere byegeranye ndetse n’imiyoboro y’abaturage baba hanze y’ibihugu byabo. Nk’uko yabivuze, ubwo bumwe butuma ubucuruzi hagati y’ibihugu bya Commonwealth buhenduka ku kigero cya 21%, kandi bukiyongera hafi 20% ugereranyije n’ibindi bihugu bifite imiterere isa. Gaston Browne yavuze ko nubwo Commonwealth ari umuryango munini, ukomeje kudakoresha neza ubushobozi ufite mu guteza imbere ubukungu. Yavuze ko inama ya CHOGM (Commonwealth Heads of Government Meeting) izabera muri Antigua na Barbuda mu Ugushyingo 2026 igomba gushyira ubucuruzi n’ishoramari ku isonga. Ati iyi nama igomba kureba uburyo inzitizi z’ubucuruzi zigabanuka, hakoroha ubwikorezi bw’ibicuruzwa, guhuza amategeko n’ubuziranenge ndetse no gufasha ba rwiyemezamirimo n’abashoramari gukora ku masoko atandukanye ya Commonwealth. Yongeyeho ko Commonwealth itagomba gusimbura imiryango y’ubukungu yo mu turere nka Afurika y’Uburasirazuba cyangwa African Continental Free Trade Area (AfCFTA), ahubwo ishobora gukorana na yo mu guteza imbere ubucuruzi mpuzamahanga. Minisitiri w’Intebe wa Antigua na Barbuda yavuze ko agaciro nyakuri ka Commonwealth kazagaragara mu myaka iri hagati y’Imikino ya Commonwealth, binyuze mu mirimo mishya, ubucuruzi buzamuka ndetse n’amahirwe mashya ku baturage b’ibihugu biyigize.