Gen. Muhoozi yateguje intambara ku bacancuro bari muri Congo

Gen. Muhoozi Kainerugaba, Umugaba Mukuru w’Ingabo za Uganda, (UPDF) akaba n'umuhungu wa Perezida Yoweri Kaguta Museveni, yateguje intambara ku bacancuro bari mu Burasirazuba bwa Repubulika Iharanira Demokarasi ya Congo. Mu ntangiriro za 2022, mu Burasirazuba bwa Repubulika Iharanira Demokarasi ya Congo hatangiye kuvugwa ko hinjiye abacanshuro, mu rugamba rwo gufasha Leta ya Congo kurwana na M23. Umunsi ku wundi hatangiye kujya hanze amashusho agaragaza abasirikare ba Congo bari kumwe n’abanyamahanga bitwaje intwaro, yaba mu modoka n’ahandi. 'Bivugwa ko mu mujyi wa Goma hari abacancuro 20 bo

Gen. Muhoozi Kainerugaba, Umugaba Mukuru w’Ingabo za Uganda, (UPDF) akaba n'umuhungu wa Perezida Yoweri Kaguta Museveni, yateguje intambara ku bacancuro bari mu Burasirazuba bwa Repubulika Iharanira Demokarasi ya Congo. Mu ntangiriro za 2022, mu Burasirazuba bwa Repubulika Iharanira Demokarasi ya Congo hatangiye kuvugwa ko hinjiye abacanshuro, mu rugamba rwo gufasha Leta ya Congo kurwana na M23. Umunsi ku wundi hatangiye kujya hanze amashusho agaragaza abasirikare ba Congo bari kumwe n’abanyamahanga bitwaje intwaro, yaba mu modoka n’ahandi. 'Bivugwa ko mu mujyi wa Goma hari abacancuro 20 bo mu mutwe wa Agemira wo muri Bulgaria. Hari abandi bacancuro bagera kuri 800 bo mu mutwe wa RALF wo muri Romania bari muri Kivu y’Amajyaruguru. Bo uretse kurinda Goma, banarinda umujyi wa Sake. Hakaba hari n'abandi barinda ikibuga cy'indege cya Goma.' Gen Muhoozi Kainerugaba, Umugaba Mukuru w’Ingabo za Uganda, utajya uripfana ku rubuga rwa X akunda kunyuzaho ibitekerezo bye. Yahagiye yandika ko atanze umuburo umwe ku bacancuro b'abazungu bakorera mu Burasirazuba bwa DRC, ko kuva tariki ya 2 Mutarama azatangira kubagabaho ibitero mu bice ingabo za Uganda zikoreramo. Ati "Ngiye gutanga umuburo umwe ku bacancuro b'abazungu bakorera mu Burasirazuba bwa DRC. Kuva tariki ya 2 Mutarama 2025, tuzatera abacancuro bose mu bice dukoreramo." Ibyo bice byo muri Congo, Gen. Muhoozi avuga bakoreramo ni ibyo muri Kivu y'Amajyaruguru ahari ingabo za Uganda zagiye mu bikorwa bya 'Operation Shujaa' igamije guhiga ibyihebe byo mu mutwe wa ADF bikorera mu mashyamba ya Repubulika Iharanira Demokarasi ya Congo ariko bikaba bijya bigaba ibitero muri Uganda.