Uruganda rwa sinema mu Rwanda rukomeje gutera imbere umunsi ku wundi, aho Hobemovie yatangaje ko igiye kumurika ku mugaragaro filime nshya y’uruhererekane yiswe “Feminist Movie”, yitezweho gutanga ubutumwa bukomeye ku mibanire, indangagaciro ndetse n’imyitwarire y’abagize umuryango nyarwanda. Iki gikorwa kizaba ku wa Kane tariki ya 25 Kamena 2027, guhera saa saba z’amanywa (13:00), muri Vision Park iherereye i Busanza, aho hazabera umuhango wo gutangaza ku mugaragaro iyi filime ndetse hakabaho n’ikiganiro n’abanyamakuru (Press Conference) kizagaragaza intego n’icyerekezo by’uyu mushinga mushy

Uruganda rwa sinema mu Rwanda rukomeje gutera imbere umunsi ku wundi, aho Hobemovie yatangaje ko igiye kumurika ku mugaragaro filime nshya y’uruhererekane yiswe “Feminist Movie”, yitezweho gutanga ubutumwa bukomeye ku mibanire, indangagaciro ndetse n’imyitwarire y’abagize umuryango nyarwanda. Iki gikorwa kizaba ku wa Kane tariki ya 25 Kamena 2027, guhera saa saba z’amanywa (13:00), muri Vision Park iherereye i Busanza, aho hazabera umuhango wo gutangaza ku mugaragaro iyi filime ndetse hakabaho n’ikiganiro n’abanyamakuru (Press Conference) kizagaragaza intego n’icyerekezo by’uyu mushinga mushya. Abazitabira uyu muhango bazabona umwanya wo kureba bwa mbere trailer ya “Feminist Movie” ndetse n’agace kihariye k’iyi filime mbere y’uko igice cya mbere gitangira gusohoka ku mugaragaro. “Feminist Movie” ivuga inkuru y’umugore ugenda ayobywa n’inshuti mbi zimwereka ubuzima bita ko bugezweho, zikamushishikariza kwirengagiza inshingano n’indangagaciro zubaka urugo n’umuryango. Izo nshuti zimwumvisha ko ibyishimo by’umugore bidashingiye ku kubana n’umugabo, ahubwo ko umugore w’iki gihe akwiriye kubaho yigenga kandi agafata ibyemezo byose ashingiye ku byifuzo bye bwite. Uko inkuru igenda ikura, uyu mugore agenda yemera izo nama n’ibitekerezo ahabwa, bituma afata imyanzuro ihindura ubuzima bwe n’imibanire ye n’abo mu muryango. Filime igaragaza uko amagambo n’inama z’abantu babi zishobora kuyobya umuntu, zikamugeza ku byemezo bishobora kugira ingaruka zikomeye ku buzima bwe no ku hazaza h’umuryango we. Abategura iyi filime bavuga ko intego yabo ari ugutanga ubutumwa bufasha abantu gutekereza ku ngaruka z’ibyemezo bafata no gushimangira ko kubaha umuco n’indangagaciro nyarwanda ari imwe mu nkingi zubaka umuryango ukomeye.

Yakinwe n’abafite amazina azwi muri sinema nyarwanda

Mu rwego rwo gutuma ubutumwa bwayo bugera ku banyarwanda benshi kandi mu buryo bw’umwuga, “Feminist Movie” yakinwemo n’abakinnyi bamaze kubaka izina muri sinema nyarwanda, barimo Ina Patrick, Kamanzi Didier na Juliet Mutamba, bafatanyije n’abandi bakinnyi bafite impano zitandukanye. Abateguye iyi filime bavuga ko hashyizwemo imbaraga nyinshi haba mu myandikire y’inkuru, imikinire y’abakinnyi ndetse no mu ikoranabuhanga ryakoreshejwe mu kuyitunganya kugira ngo izabashe guhangana ku rwego mpuzamahanga. Umuhango wo kumurika “Feminist Movie” uzaba kandi umwanya wo kugaragaza icyerekezo cya Hobemovie mu guteza imbere sinema nyarwanda ifite uruhare mu kubaka sosiyete binyuze mu nkuru zishingiye ku buzima bwa buri munsi. Abakunzi ba sinema, abafatanyabikorwa, abashoramari ndetse n’abanyamakuru batumiwe kwitabira iki gikorwa kizaba ari intambwe nshya mu rugendo rwo guteza imbere sinema nyarwanda no kuyigeza ku rwego rwisumbuyeho.

Ina Patrick ni umwe mu bakinnyi bafite uruhare rukomeye muri filime nshya y’uruhererekane “Feminist Movie”.

Kamanzi Didier ari mu bakinnyi b’imena bagaragara muri “Feminist Movie” ya Hobemovie.

Juliet Mutamba ni umwe mu bakinnyi bagize uruhare mu gutanga ubutumwa bwa “Feminist Movie”

Wareba zimwe muri filime bakinnye unyuze hano kuri iyi link

https://youtu.be/qCRAvXAGAcg?si=94FmH4mYj3snX3QL

A little more informed. A little more connected.