Guverinoma ya Niger iyobowe n’igisirikare yasinyanye amasezerano mashya n’amasosiyete y’Abashinwa akora ibijyanye na peteroli, mu rwego rwo gukomeza ubufatanye mu by’ingufu no kongera ubushobozi bw’iki gihugu mu kugenzura umutungo kamere wacyo. Aya masezerano mashya aje mu gihe ibihugu bigize Ihuriro rya Alliance of Sahel States (AES) birimo Niger, Mali na Burkina Faso, bikomeje gushyira imbere gahunda yo kwigenga ku mutungo kamere no kugabanya ubushobozi bw’ibihugu byo mu Burengerazuba bw’Isi mu rwego rw’ubukungu n’ingufu. Minisitiri w’Intebe wa Niger, Ali Mahaman Lamine Zeine, ni we wayoboye

Guverinoma ya Niger iyobowe n’igisirikare yasinyanye amasezerano mashya n’amasosiyete y’Abashinwa akora ibijyanye na peteroli, mu rwego rwo gukomeza ubufatanye mu by’ingufu no kongera ubushobozi bw’iki gihugu mu kugenzura umutungo kamere wacyo.

Aya masezerano mashya aje mu gihe ibihugu bigize Ihuriro rya Alliance of Sahel States (AES) birimo Niger, Mali na Burkina Faso, bikomeje gushyira imbere gahunda yo kwigenga ku mutungo kamere no kugabanya ubushobozi bw’ibihugu byo mu Burengerazuba bw’Isi mu rwego rw’ubukungu n’ingufu.

Minisitiri w’Intebe wa Niger, Ali Mahaman Lamine Zeine, ni we wayoboye umuhango wo gushyira umukono kuri aya masezerano mashya hagati ya Niger na sosiyete y’Abashinwa ya China Oil and Gas Exploration and Development Corporation.

Aya masezerano akubiyemo kongera gutangiza imishinga minini ya peteroli ya Dinga Deep na Abolo-Yogou, aho biteganyijwe ko izashorwamo arenga miliyari imwe y’amadolari ya Amerika.

Minisitiri w’Ububanyi n’Amahanga wa Niger, Bakary Yaou Sangare, yavuze ko iyi mishinga izafasha iki gihugu kongera umusaruro wa peteroli kivana kuri barili ibihumbi 110 ku munsi ukagera ku bihumbi 145 bitarenze umwaka wa 2029.

Yanavuze ko amafaranga Niger yishyuraga mu kugeza peteroli ku isoko mpuzamahanga binyuze mu muyoboro wa Niger-Benin yagabanutse ava ku madolari 27 kuri barili ajya kuri 15, ibintu bishobora gutuma iki gihugu kizigama arenga miliyoni 106$ buri mwaka.

Muri aya masezerano kandi, Niger yahawe imigabane ingana na 45% muri West African Oil Pipeline Company, ishami rya China National Petroleum Corporation rishinzwe gucunga umuyoboro wohereza peteroli unyura muri Benin.

Aya masezerano aje nyuma y’igihe hari umwuka mubi hagati ya Niger n’amasosiyete y’Abashinwa akorera muri iki gihugu, ashinjwa kudaha amahirwe abaturage ba Niger ndetse no gutanga imishahara iri hasi ku bakozi b’imbere mu gihugu ugereranyije n’abanyamahanga.

Mu 2025, Minisitiri wa Peteroli wa Niger, Sahabi Oumarou, yari yasabye ko bamwe mu bakozi b’abanyamahanga bamaze imyaka irenga ine muri iki gihugu basezererwa, hagamijwe guha amahirwe abaturage ba Niger.

Hari kandi n’abayobozi batatu bakomeye b’Abashinwa birukanywe muri sosiyete zirimo CNPC, West African Oil Pipeline Company ndetse na SORAZ refinery, kubera ibibazo by’imikorere n’ubusumbane mu mishahara.

Aya masezerano mashya ateganya kandi ko abaturage ba Niger bazahabwa imirimo igera kuri 450 mbere ya 2030, kongera amahirwe ku bigo by’imbere mu gihugu ndetse no kugabanya ikinyuranyo cy’imishahara hagati y’abakozi b’abanyamahanga n’abenegihugu.

Ibi bigaragaza uburyo ibihugu bya AES bikomeje gushaka ubwisanzure mu micungire y’umutungo kamere wabyo, ndetse bikaba biri no gushaka abafatanyabikorwa bashya barimo u Bushinwa, mu gihe umubano wabyo n’ibihugu byo mu Burengerazuba bw’Isi ukomeje kugenda uhinduka.

A little more informed. A little more connected.