Perezida wa Leta Zunze Ubumwe za Amerika, Donald Trump, yasoje uruzinduko rw’iminsi ibiri yagiriraga mu Bushinwa nta masezerano akomeye ku bucuruzi cyangwa ku kibazo cy’intambara ya Iran agezeho, nubwo we na Perezida Xi Jinping bagaragaje ubushuti n’icyizere hagati y’ibihugu byombi. Uru ruzinduko rwabaye ku nshuro ya mbere Perezida wa Amerika asuye u Bushinwa kuva 2017,  rwari  uruzinduko  rwitezweho ibisubizo bifatika byafasha Trump kuzamura icyizere cy’abamushyigikiye mbere y’amatora y’abagize Inteko ateganyijwe muri uyu mwaka. Mu biganiro byabereye i Beijing, Xi Jinping yatumiwe kuzagirira

Perezida wa Leta Zunze Ubumwe za Amerika, Donald Trump, yasoje uruzinduko rw’iminsi ibiri yagiriraga mu Bushinwa nta masezerano akomeye ku bucuruzi cyangwa ku kibazo cy’intambara ya Iran agezeho, nubwo we na Perezida Xi Jinping bagaragaje ubushuti n’icyizere hagati y’ibihugu byombi.

Uru ruzinduko rwabaye ku nshuro ya mbere Perezida wa Amerika asuye u Bushinwa kuva 2017,  rwari  uruzinduko  rwitezweho ibisubizo bifatika byafasha Trump kuzamura icyizere cy’abamushyigikiye mbere y’amatora y’abagize Inteko ateganyijwe muri uyu mwaka.

Mu biganiro byabereye i Beijing, Xi Jinping yatumiwe kuzagirira uruzinduko muri Amerika mu gihe cy’itumba, ibintu byagaragajwe nk’ikimenyetso cyo gukomeza kuganira hagati y’ibihugu byombi nubwo bikomeje guhangana mu bya politiki n’ubukungu.

Nubwo ibiganiro byari birimo ubwubahane n’imihango idasanzwe, inyuma y’iyo sura nziza hari ubutumwa bukomeye Xi yahaye Trump ku kibazo cya Taiwan. Perezida w’u Bushinwa yamubwiye ko uburyo Amerika yakwitwara nabi kuri Taiwan bushobora guteza amakimbirane akomeye hagati y’ibihugu byombi.

Trump yavuze ko Xi yamubwiye ko adashyigikiye ubwigenge bwa Taiwan, ariko yirinda kugira icyo asezeranya kuri icyo kibazo. Yanongeyeho ko azafata icyemezo ku bijyanye no kugurisha intwaro Taiwan nyuma yo kuganira n’uyoboye icyo kirwa.

Iki kibazo cya Taiwan gikomeje kuba kimwe mu bikomeye mu mubano wa Amerika n’u Bushinwa, cyane ko Beijing ifata Taiwan nk’intara yayo kandi itarigeze ikuraho amahirwe yo gukoresha imbaraga za gisirikare kugira ngo iyigarure.

Ku rundi ruhande, Trump yari yitezweho gusubirana amasezerano akomeye y’ubucuruzi harimo ayo kugurisha indege za Boeing mu Bushinwa. Gusa ibyo byatangajwe ntabwo byashimishije abashoramari kuko Trump yavuze ko u Bushinwa buzagura indege 200 gusa, mu gihe hari hamaze iminsi havugwa amasezerano ashobora kugera ku ndege 500.

Ibi byatumye imigabane ya Boeing igabanukaho 4%, ibintu byagaragaje ko amasoko atanyuzwe n’ibyavuye muri uru ruzinduko.

Amerika kandi yashakaga ko u Bushinwa bufasha gushyira igitutu kuri Iran kugira ngo ihagarike intambara iri mu Burasirazuba bwo Hagati, ariko Beijing ntiyigeze itanga isezerano rifatika kuri icyo kibazo.

Minisiteri y’Ububanyi n’Amahanga y’u Bushinwa yavuze ko iyo ntambara “itari ikwiye kuba yarabayeho kandi nta mpamvu yo gukomeza,” ariko inashimangira ko hakenewe ibiganiro by’amahoro aho gufata uruhande rumwe.

Abasesenguzi mpuzamahanga bavuga ko bigoye ko Xi Jinping yashyira igitutu gikomeye kuri Iran kuko icyo gihugu gifatwa nk’umufatanyabikorwa ukomeye w’u Bushinwa mu guhangana n’influence ya Amerika ku Isi.

Nubwo Trump yagaragaje ko urugendo rwe rwagenze neza, hari benshi babona ko nta musaruro ukomeye rwatanze nk’uko byari byitezwe, cyane cyane ku bibazo bikomeye by’ubucuruzi, intambara ya Iran ndetse n’ikibazo cya Taiwan gikomeje guteza impungenge ku Isi.

A little more informed. A little more connected.