Umuhanzikazi Taylor Swift ari mu ntambara y’amategeko n’umunyamideli ndetse n’umuhanzi wo muri Las Vegas witwa Maren Wade, bapfa uburenganzira ku izina rifitanye isano n’album nshya ya Swift yitwa “The Life of a Showgirl.” Mu iburanisha ryabaye ku wa Gatatu i Los Angeles, abanyamategeko ba Taylor Swift basabye urukiko kutemera icyifuzo cya Wade cyo guhagarika by’agateganyo igurishwa ry’ibicuruzwa bya album birimo buji, ibikombe, imisatsi n’ibindi byanditseho “The Life of a Showgirl.” Umwunganizi wa Swift, J. Douglas Baldridge, yavuze ko album ari igihangano cy’ubuhanzi gifite uburenganzira bwo

Umuhanzikazi Taylor Swift ari mu ntambara y’amategeko n’umunyamideli ndetse n’umuhanzi wo muri Las Vegas witwa Maren Wade, bapfa uburenganzira ku izina rifitanye isano n’album nshya ya Swift yitwa “The Life of a Showgirl.”

Mu iburanisha ryabaye ku wa Gatatu i Los Angeles, abanyamategeko ba Taylor Swift basabye urukiko kutemera icyifuzo cya Wade cyo guhagarika by’agateganyo igurishwa ry’ibicuruzwa bya album birimo buji, ibikombe, imisatsi n’ibindi byanditseho “The Life of a Showgirl.”

Umwunganizi wa Swift, J. Douglas Baldridge, yavuze ko album ari igihangano cy’ubuhanzi gifite uburenganzira bwo kurindwa n’amategeko agenga ubwisanzure bwo gutanga ibitekerezo. Yavuze ko nta buryo abafana cyangwa abakurikira ibikorwa bya Maren Wade bashobora kwitiranya ibikorwa bye n’ibya Taylor Swift.

Ati: “Iyi ni album, igihangano cy’ubuhanzi kizwi kandi kirinzwe n’itegeko. Ni yo mpamvu ubwisanzure bwo gutanga ibitekerezo bugomba kubahirizwa.”

Maren Wade yareze Taylor Swift muri Werurwe 2026, avuga ko album ye nshya ibangamira ikirango cye “Confessions of a Showgirl” amaze imyaka irenga 10 yubakaho ibikorwa bye birimo ibitaramo, podcast, igitabo ndetse n’inkuru yandikaga muri Las Vegas Weekly.

Umwunganizi wa Wade yavuze ko ikirango cya klienti we cyanditswe mu buryo bwemewe n’amategeko kandi ko ubuyobozi bwa Amerika bushinzwe ibirango bwigeze kwanga ubusabe bwa Taylor Swift bwo kwandikisha izina rya album kubera ko rishobora guteza urujijo ku isoko.

Yavuze kandi ko kuva Taylor Swift yatangaza album ye, abantu benshi batangiye kwitiranya ibikorwa bya Wade n’ibya Swift, ndetse no gushakisha “Confessions of a Showgirl” kuri Google bikaba bitanga ibisubizo bifitanye isano na Taylor Swift.

Ku ruhande rwa Swift, abanyamategeko be bavuga ko Wade ubwe yagerageje gukoresha izina rya Swift kugira ngo yongere abakurikirana ibikorwa bye ku mbuga nkoranyambaga ndetse no ku rubuga rwe rw’ubucuruzi.

Urukiko rwavuze ko ruzatanga icyemezo cyarwo mu nyandiko mu minsi iri imbere ku busabe bwa Wade bwo guhagarika by’agateganyo igurishwa ry’ibicuruzwa bya album ya Taylor Swift

A little more informed. A little more connected.