U Rwanda rwakiriye toni 40.000 z’ibikomoka kuri peteroli zinyuze i Mombasa

U Rwanda rwakiriye toni 40.000 z’ibikomoka kuri peteroli bitunganyije, zagejejwe ku Cyambu cya Mombasa muri Kenya ku wa 29 Nzeri 2026. Ibi ni byo byiciro bya mbere byanyujijwe mu nzira nshya y’ubwikorezi yashyizweho n’u Rwanda na Kenya, igamije kongera amahitamo mu gutumiza ibikomoka kuri peteroli. Ibyo bicuruzwa byagejejwe muri Kenya n’ubwato MT Sea Wolf, bubigeza kuri Kipevu Oil Terminal 2. Ni igikorwa gishingiye ku masezerano y’ubufatanye yasinywe hagati y’u Rwanda na Kenya muri Kamena 2026. Binyuze muri ayo masezerano, u Rwanda ruzajya rukoresha icyambu cya Mombasa, imiyoboro ya Kenya it

U Rwanda rwakiriye toni 40.000 z’ibikomoka kuri peteroli bitunganyije, zagejejwe ku Cyambu cya Mombasa muri Kenya ku wa 29 Nzeri 2026. Ibi ni byo byiciro bya mbere byanyujijwe mu nzira nshya y’ubwikorezi yashyizweho n’u Rwanda na Kenya, igamije kongera amahitamo mu gutumiza ibikomoka kuri peteroli. Ibyo bicuruzwa byagejejwe muri Kenya n’ubwato MT Sea Wolf, bubigeza kuri Kipevu Oil Terminal 2. Ni igikorwa gishingiye ku masezerano y’ubufatanye yasinywe hagati y’u Rwanda na Kenya muri Kamena 2026. Binyuze muri ayo masezerano, u Rwanda ruzajya rukoresha icyambu cya Mombasa, imiyoboro ya Kenya itwara ibikomoka kuri peteroli n’ububiko bwabyo, mbere y’uko bijyanwa mu Rwanda binyuze mu Muhora wa Ruguru. Umunyamabanga wa Leta muri Minisiteri y’Ibikorwa Remezo, Armand Zingiro, yavuze ko iyi nzira nshya izafasha u Rwanda kubona ibikomoka kuri peteroli mu buryo bwizewe kandi bworoshye, binyuze mu bufatanye n’ibindi bihugu byo mu karere. Gukoresha inzira ya Mombasa byitezweho gufasha u Rwanda kugira ubundi buryo bwo gutumiza ibikomoka kuri peteroli, bikagabanya ingaruka zaterwa n’ikibazo cyavuka ku nzira imwe rukumbi. Bishobora kandi gufasha kunoza ubwikorezi n’imicungire y’ububiko bw’ibikomoka kuri peteroli. Kwakira toni 40.000 z’ibikomoka kuri peteroli binyuze i Mombasa ni intambwe nshya mu bufatanye bw’u Rwanda na Kenya. Icyakora, ingaruka z’iyi gahunda ku biciro bya lisansi na mazutu mu Rwanda zizaterwa n’impamvu zitandukanye, zirimo ibiciro ku isoko mpuzamahanga n’ikiguzi cy’ubwikorezi. UMWANDITSI: MUNYERAGWE Josue