Ikigo cy’Igihugu cy’Ibarurishamibare (NISR) cyatangaje ko umusaruro mbumbe w’u Rwanda (GDP) mu gihembwe cya mbere cya 2026 wageze kuri miliyari 6.346 Frw, uvuye kuri miliyari 5.276 Frw mu gihembwe nk’iki cya 2025, bikaba bingana n’izamuka rya 10%. Imibare ya NISR igaragaza ko urwego rwa serivisi rwakomeje kugira uruhare runini mu bukungu bw’u Rwanda, rugira 52% by’umusaruro mbumbe. Inganda zagize uruhare rwa 24%, ubuhinzi bugira uruhare rwa 19%, mu gihe ibindi bikorwa by’ubukungu byatanze 5% bisigaye. Mu rwego rw’umusaruro, ubuhinzi bwiyongereyeho 8%, inganda ziyongeraho 13%, naho serivisi z

Ikigo cy’Igihugu cy’Ibarurishamibare (NISR) cyatangaje ko umusaruro mbumbe w’u Rwanda (GDP) mu gihembwe cya mbere cya 2026 wageze kuri miliyari 6.346 Frw, uvuye kuri miliyari 5.276 Frw mu gihembwe nk’iki cya 2025, bikaba bingana n’izamuka rya 10%. Imibare ya NISR igaragaza ko urwego rwa serivisi rwakomeje kugira uruhare runini mu bukungu bw’u Rwanda, rugira 52% by’umusaruro mbumbe. Inganda zagize uruhare rwa 24%, ubuhinzi bugira uruhare rwa 19%, mu gihe ibindi bikorwa by’ubukungu byatanze 5% bisigaye. Mu rwego rw’umusaruro, ubuhinzi bwiyongereyeho 8%, inganda ziyongeraho 13%, naho serivisi ziyongeraho 7% ugereranyije n’igihembwe cya mbere cya 2025. Umuyobozi Mukuru Wungirije wa NISR, Mwizerwa Jean Claude, yavuze ko umusaruro w’ibyoherezwa hanze y’igihugu wazamutseho 39%, ahanini bitewe n’izamuka rikomeye ry’umusaruro w’ikawa woherejwe hanze, wazamutseho 86%. Ku rundi ruhande, umusaruro w’icyayi woherejwe hanze wagabanutseho 3%. Yongeyeho ko umusaruro w’ibiribwa ngandurarugo nawo wazamutseho 3%, bigaragaza ko urwego rw’ubuhinzi rwakomeje gutanga umusanzu mu iterambere ry’ubukungu. Mu rwego rwa serivisi, ubucuruzi buranguza n’ubudandaza bwazamutseho 11%, mu gihe ubwikorezi nabwo bwiyongereyeho 11%. Muri bwo, ubwikorezi bwo ku butaka bwazamutseho 10%, naho ubwikorezi bwo mu kirere bwiyongeraho 7%. Serivisi z’itumanaho n’ikoranabuhanga zakomeje kwitwara neza, zizamukaho 22%, mu gihe urwego rw’ibigo by’imari n’ubwishingizi rwiyongereyeho 11%. Uburezi bwazamutseho 3%, ariko serivisi za hoteli na restaurant zagabanutseho 16%. Minisitiri w’Imari n’Igenamigambi, Yusuf Murangwa, yavuze ko umuvuduko mwiza w’iterambere ry’ubukungu watangiye mu mwaka ushize wakomeje no mu ntangiriro za 2026. Yagaragaje ko ubukungu bwari bwazamutseho 11,8% mu gihembwe cya gatatu cya 2025 na 11,2% mu gihembwe cya kane cy’uwo mwaka, ashimangira ko iyo nta mbogamizi zikomeye zibayeho, ubukungu bukomeza gukura ku muvuduko mwiza. Ku bijyanye n’ingaruka z’intambara iri mu Burasirazuba bwo Hagati, Minisitiri Murangwa yavuze ko kugeza ubu zitagaragaye cyane ku bukungu bw’u Rwanda, ariko ko Guverinoma ikomeje gufata ingamba zitandukanye zirimo kwihutisha ishyirwa mu bikorwa ry’imishinga y’iterambere no korohereza abashoramari kugira ngo ibikorwa by’ubukungu bikomeze gutera imbere. Yongeyeho ko hari gukurikiranwa by’umwihariko urwego rwa hoteli na restaurant, cyane cyane ku bijyanye n’ibiciro by’ibiribwa, kuko iyo bizamutse bishobora kugira ingaruka ku musaruro w’uru rwego. Iyi mibare igaragaza ko ubukungu bw’u Rwanda bwakomeje kwiyongera ku rwego rushimishije mu ntangiriro za 2026, bufashwa cyane n’izamuka ry’ibyoherezwa hanze, ibikorwa by’inganda ndetse n’iterambere rya serivisi z’ikoranabuhanga n’itumanaho.

A little more informed. A little more connected.