Ubwato bwari butwaye abantu 243 bwaburiye mu nyanja ya Java

Abatabazi muri Indonesia bakomeje ibikorwa byo gushakisha ubwato Virgo Transport 8 , bwari butwaye abantu 243, nyuma yo kubura aho buherereye mu Nyanja ya Java ubwo bwari buvuye mu mujyi wa Surabaya bwerekeza i Banjarmasin. Amakuru yatangajwe n’abashinzwe ubutabazi avuga ko ubwato bwahuye n’ikirere kibi, mbere y’uko umuyobozi wabwo atakaza itumanaho n’inzego z’ubuyobozi mu gitondo cyo ku Cyumweru. Ubwato bwari bwavuye i Surabaya ku wa Gatandatu ahagana saa yine n’iminota 13 za mu gitondo, bugana i Banjarmasin, umurwa mukuru w’intara ya South Kalimantan. Kugeza ubu, abantu 102 bamaze gutabar

Abatabazi muri Indonesia bakomeje ibikorwa byo gushakisha ubwato Virgo Transport 8, bwari butwaye abantu 243, nyuma yo kubura aho buherereye mu Nyanja ya Java ubwo bwari buvuye mu mujyi wa Surabaya bwerekeza i Banjarmasin. Amakuru yatangajwe n’abashinzwe ubutabazi avuga ko ubwato bwahuye n’ikirere kibi, mbere y’uko umuyobozi wabwo atakaza itumanaho n’inzego z’ubuyobozi mu gitondo cyo ku Cyumweru. Ubwato bwari bwavuye i Surabaya ku wa Gatandatu ahagana saa yine n’iminota 13 za mu gitondo, bugana i Banjarmasin, umurwa mukuru w’intara ya South Kalimantan. Kugeza ubu, abantu 102 bamaze gutabarwa, mu gihe umuntu umwe yitabye Imana. Abatabazi bakomeje gushakisha abandi bantu bashobora kuba bakiri mu kaga. Umuyobozi w’Ibiro bishinzwe ubutabazi i Banjarmasin, I Putu Sudayana, yavuze ko inzego z’ubutabazi zakusanyije abakozi n’ibikoresho bishoboka byose, bitewe n’umubare munini w’abantu bari muri ubwo bwato. Ubwato bwari buheruka kumenyekana ko buri mu Nyanja ya Java, hafi kilometero 148 uvuye ku cyambu cya Banjarmasin. Indoneziya, igihugu kigizwe n’ibirwa bigera ku 17,000, yishingikiriza cyane ku bwato mu gutwara abantu hagati y’ibirwa. Ingendo zo mu nyanja zikoreshwa n’abaturage benshi kuko akenshi ziba zihendutse kandi ziboneka kurusha ingendo zo mu ndege. Nubwo ibikorwa byo gutabara bikomeje, ikirere kibi n’imiterere y’inyanja biracyari bimwe mu bibangamira ibikorwa byo gushakisha no gutabara.