Ikigo cy’Igihugu cy’Ibarurishamibare cyatangaje ko umusaruro mbumbe w’ubukungu bw’u Rwanda wageze kuri miliyari 4,806 Frw mu gihembwe cya gatatu cya 2024, uvuye kuri miliyari 4,246 Frw wari mu gihembwe cya gatatu cya 2023. Imibare yashyizwe hanze n’Ikigo cy’Igihugu cy’Ibarurishamibare, kuri uyu wa Kabiri tariki ya 17 Ukuboza 2024, yerekanye ko umusaruro mbumbe w’ubukungu bw’u Rwanda wazamutse ku kigero cya 8.1% mu gihembwe cya gatatu cya 2024, nyuma y’uko wari wazamutse ku kigero cya 9.8% mu gihembwe cya kabiri cy’uyu mwaka, ndetse na 9.7% mu gihembwe cya mbere cy’uyu mwaka. Imibare igaragaz

Ikigo cy’Igihugu cy’Ibarurishamibare cyatangaje ko umusaruro mbumbe w’ubukungu bw’u Rwanda wageze kuri miliyari 4,806 Frw mu gihembwe cya gatatu cya 2024, uvuye kuri miliyari 4,246 Frw wari mu gihembwe cya gatatu cya 2023. Imibare yashyizwe hanze n’Ikigo cy’Igihugu cy’Ibarurishamibare, kuri uyu wa Kabiri tariki ya 17 Ukuboza 2024, yerekanye ko umusaruro mbumbe w’ubukungu bw’u Rwanda wazamutse ku kigero cya 8.1% mu gihembwe cya gatatu cya 2024, nyuma y’uko wari wazamutse ku kigero cya 9.8% mu gihembwe cya kabiri cy’uyu mwaka, ndetse na 9.7% mu gihembwe cya mbere cy’uyu mwaka. Imibare igaragaza ko urwego rwa serivisi rwagize uruhare rungana na 49%, ubuhinzi bugira 24%, mu gihe urwego rw’inganda rwagize uruhare rungana na 20%, imisoro yinjijwe igira 7%. Minisitiri w’Imari n’Igenamigambi, Yusuf Murangwa, yavuze ko uburyo ubukungu bw’u Rwanda buzamukaho ari “Ikigero cyiza, gitanga icyizere ku bukungu bwacu.” Muri rusange, umusaruro w’urwego rw’ubuhinzi wazamutse ku kigero cya 4% muri iki gihembwe ugereranyije n’igihembwe cya gatatu cya 2023, urw’urwego rw’inganda uzamuka kuri 8%, mu gihe uw’urwego rwa serivisi wazamutse ku kigero cya 10%. Murangwa ufite Imari n'Igenamigambi  mu nshingano yavuze ko umusaruro w’ubukungu bw’u Rwanda atari ari mubi, izamuka ry’ibiciro ridakabije ndetse n’itakazagaciro k’ifaranga ry’u Rwanda ridakabije. Yongeyeho ko ukurikije uko ubukungu bwazamutse, bitanga icyizere cy’uko mu 2025 buzarushaho kwitwara neza. Ati “Nta mpinduka turi kubona zidasanzwe, ubukungu bw’u Rwanda bwakabaye buzaba bwiza mu 2025… impuzandengo ihagaze kuri 9.2%, imibare ikomeje gutya, ubukungu bwazamuka ku kigero kiri hejuru 8% cyangwa 9%.” Muri Gahunda y’icyiciro cya kabiri cya gahunda y’Igihugu yo kwihutisha Iterambere ( NST2), Guverinoma yihaye intego yo kuzamura ubukungu bw’Igihugu ku kigero cya 9,3% buri mwaka. Kugira ngo iyi ntego izagerweho, hazongerwa umusaruro mu nzego zose z’ubukungu. Aho hazakorwa ku buryo ubuhinzi buziyongera ku kigero cyo hejuru ya 6%, naho inganda na serivisi bikaziyongera hejuru ya 10% buri mwaka. Ibi bigomba guherekezwa no kwiyongera kw’ibikorerwa mu Rwanda (Made in Rwanda), bizagira uruhare mu kongera ingano y’ibyoherezwa mu mahanga biteganyijwe kuzazamuka ku kigero cya 13% buri mwaka. Mu bindi bisabwa, ishoramari ry’abikorera rizava kuri miliyari 2,2 z’Amadolari ya Amerika (bingana na 15,9% y’Umusaruro Mbumbe w’Igihugu), rizagere kuri miliyari 4,6 (bingana na 21,5%).

A little more informed. A little more connected.