Ishami ry’Umuryango w’Abibumbye ryita ku biribwa n’ubuhinzi (FAO) rivuga ko amashyamba n’ibiti byo mu bice byumagaye ku isi bifasha abantu barenga miliyari ebyiri kubona imibereho, ibiribwa no kubungabunga umuco wabo. Icyakora, FAO ivuga ko ayo mashyamba atarahabwa agaciro gakwiye mu ngamba mpuzamahanga zo guhangana n’imihindagurikire y’ikirere, kubungabunga urusobe rw’ibinyabuzima no kurengera ubutaka. FAO's Call to Action on Dryland Forests, yatangije ubusabe bwo gushyira ingufu mu kubungabunga ayo mashyamba, mu nama yabereye i Roma mu Butaliyani, mu rwego rw’Icyumweru cya 10 cy’Amashyamba

  Ishami ry’Umuryango w’Abibumbye ryita ku biribwa n’ubuhinzi (FAO) rivuga ko amashyamba n’ibiti byo mu bice byumagaye ku isi bifasha abantu barenga miliyari ebyiri kubona imibereho, ibiribwa no kubungabunga umuco wabo. Icyakora, FAO ivuga ko ayo mashyamba atarahabwa agaciro gakwiye mu ngamba mpuzamahanga zo guhangana n’imihindagurikire y’ikirere, kubungabunga urusobe rw’ibinyabuzima no kurengera ubutaka. FAO's Call to Action on Dryland Forests, yatangije ubusabe bwo gushyira ingufu mu kubungabunga ayo mashyamba, mu nama yabereye i Roma mu Butaliyani, mu rwego rw’Icyumweru cya 10 cy’Amashyamba ku Isi. Ubu busabe burasaba za guverinoma, abaterankunga n’abafatanyabikorwa kongera imicungire irambye, gusana no kurinda amashyamba yo mu bice byumagaye. Bunashishikariza ibihugu kuyashyira mu byihutirwa mu igenamigambi ryabyo rijyanye n’ikirere, urusobe rw’ibinyabuzima n’imikoreshereze y’ubutaka, ndetse no kongera amafaranga ashyirwa mu kubungabunga ayo mashyamba. Umuyobozi Mukuru wa FAO, QU Dongyu, yavuze ko amashyamba yo mu bice byumagaye ari ingenzi ku buzima bw’abantu ndetse no ku bazabaho mu gihe kizaza. Yavuze ko ariko akenshi atitabwaho bihagije, adakurikiranwa uko bikwiye kandi adahabwa amafaranga ahagije. Ibice byumagaye birangwa n’ikibazo cy’ibura ry’amazi, kandi bifite amashyamba, ibihuru n’ibiti bitari mu mashyamba. Bifata hafi 41% by’ubuso bw’ubutaka bw’Isi, mu gihe bigize hafi 27% by’amashyamba yose ku isi. Ayo mashyamba atanga ibikomoka ku biti n’ibindi bidakomoka ku biti bikenerwa cyane. Afasha abantu guhangana n’amapfa, ndetse akabaha ibikoresho by’ibanze birimo inkwi, ubwatsi bw’amatungo, ibiribwa bikomoka ku gasozi n’ibimera bivura. Nanone afasha ubuhinzi n’ubworozi kwihanganira ibihe bikomeye, arinda ubutaka n’amazi, kandi agatanga ibiribwa n’amafaranga mu gihe imyaka yangiritse yongera ubwirinzi. Ariko hafi 25% by’urusobe rw’ibinyabuzima rw’amashyamba yo mu bice byumagaye rumaze kwangirika. Ibi biterwa ahanini no guhindura imikoreshereze y’ubutaka, kwagura ubuhinzi, imijyi ndetse no gukoresha umutungo kamere mu buryo budashobora gukomeza igihe kirekire. Imihindagurikire y’ikirere nayo irongera iki kibazo, kuko iyo izuba rimaze kumara igihe kirekire, ikibazo cy’amazi kiriyongera ndetse n’ingaruka z’inkongi z’imiriro zikaba nyinshi. Izi ngaruka zigira uburemere cyane ku bahinzi bato, Aborozi n’abaturage b’aho hantu.   FAO yasabye ko hashyirwaho Dryland Forest Support Accelerator, urubuga ruzafasha ibihugu gushyira ibikorwa byo kurinda amashyamba yo mu bice byumagaye mu igenamigambi ry’igihugu. Iyi gahunda izafasha ibihugu kubona inkunga y’igihe kirekire, kunoza uburyo bwo gukurikirana uko ayo mashyamba ameze no guhuza inzego zitandukanye. FAO ivuga ko ibisubizo byo kubungabunga no gusana ayo mashyamba bisanzwe bihari, ariko ko hakenewe ubushake n’amikoro kugira ngo bishyirwe mu bikorwa ku rwego runini. Ubu busabe kandi burasaba za guverinoma, abaterankunga n’amasezerano mpuzamahanga ya Rio guha amashyamba yo mu bice byumagaye umwanya munini mu byemezo bya politiki n’ishoramari ryerekeye ibidukikije ku rwego mpuzamahanga. FAO irasaba kandi ko ayo mashyamba yemerwa ku mugaragaro nk’urusobe rw’ibinyabuzima rw’ibanze rugomba kwitabwaho hashingiwe ku Masezerano y’Umuryango w’Abibumbye yo kurwanya ubutayu (UNCCD).

A little more informed. A little more connected.