Hatangajwe inzira za Tour du Rwanda ya 2025

Ishyirahamwe ry'Umukino wo Gusiganwa ku Magare (FERWACY) n'abafatanyabikorwa baryo bamuritse inzira y'ibilometero 812, bizakoreshwa ubwo irushanwa ryo gusiganwa ku magare rya Tour du Rwanda rizaba riba mu 2025. Ni umuhango wabaye ku wa Gatanu, tariki 29 Ugushyingo 2024. Muri uyu muhango, hatangajwe ko Tour du Rwanda izaba iba ku nshuro ya 17 kuva ibaye mpuzamahanga, mu gihe izaba ari ku nshuro ya karindwi kuva igeze ku rwego rwa 2,1. Tour du Rwanda 2025 igizwe n’ibilometero 812, ikazangira tariki ya 23 Gashyantare isozwe tariki ya 2 Werurwe 2025. Inzira za Tour du Rwanda 2025 Agace ka M

Inzira za Tour du Rwanda 2025

Agace ka Mbere: Ku Cyumweru, tariki ya 23 Gashyantare: Stade Amahoro – Stade Amahoro (Gusiganwa n’ibihe nk’umukinnyi ku giti cye ibilometero 4). Agace ka Kabiri: Ku wa Mbere, tariki ya 24 Gashyantare: Rukomo - Kayonza (ibilometero 158). Agace ka Gatatu: Ku wa Kabiri, tariki ya 25 Gashyantare: Kigali - Musanze (ibilometero 121). Agace ka Kane: Ku wa Gatatu, tariki ya 26 Gashyantare: Musanze - Rubavu (ibilometero 102). Agace ka Gatanu: Ku wa Kane, tariki ya 27 Gashyantare: Rubavu - Karongi ( ibilometero 97) Agace ka Gatandatu: Ku wa Gatanu, tariki ya 28 Gashyantare: Rusizi - Huye (ibilometero 143). Agace ka Karindwi: Ku wa Gatandatu, tariki ya 1 Werurwe: Nyanza - Canal Olympia (ibilometero 114). Agace ka Munani: Ku Cyumweru, tariki ya 2 Werurwe: KCC-KCC (ibilometero 73).

Kugeza ubu amakipe 16 amaze kwemeza ko azitabira ayo arimo:

Amakipe yabigize umwuga azitabira ni Israel - Premier Tech (Israel) na TotalEnergies (U Bufaransa). Amakipe akina amarushanwa yo ku migabane (Continental Teams) ni Soudal Quick-step Dev Team (U Bubiligi), Lotto–Dstny (U Bubiligi), Team Amani (Rwanda), Bike Aid ( U Budage), Development Team dsm–firmenich PostNL (u Buholandi), Java InovoTec (Rwanda), May Stars (Rwanda) na UAE (United Arab Emirates). Amakipe y’Ibihugu ni: U Rwanda, Angola, Afurika y’Epfo, Eritrea, Ethiopia, na UCI Centre Mondiale du Cyclisme (igizwe n’amakipe ya Afurika avanze). Umuyobozi wa Tour du Rwanda, Freddy Kamuzinzi, yavuze ko isiganwa ry'uyu mwaka rizaba rifite umwihariko kuko rizaba mu mwaka umwe na Shampiyona y’Isi. Ati “Nizere ko mwese mwishimiye ko isiganwa rigiye kongera kuba. Ntabwo Tour du Rwanda itaha izaba yihariye gusa, ahubwo igiye kuba mu mwaka umwe na Shampiyona y’Isi y’Amagare izabera bwa mbere muri Afurika,” “Ni isiganwa rizerekana uko imyiteguro ihagaze ku isiganwa rizaba rikomeye cyane rizahuza amakipe akomeye ku Isi, ahanganira mu mihanda izatanga akazi.”

Umuyobozi wa Tour du Rwanda, Freddy Kamuzinzi.

Minisitiri wa Siporo, Nyirishema Richard, yavuze ko Tour du Rwanda ari igikorwa kirenze isiganwa ahubwo kinagaragaza ubwiza bw'Igihugu, urukundo rw'igare no gusangiza Isi amateka y'u Rwanda. Ati "Tour du Rwanda 2025 izerekana uko twiteguye kwakira Shampiyona y'Isi.'' Minisitiri Nyirishema yavuze ko Abanyarwanda banyotewe no kongera kubona umwenegihugu atwara Tour du Rwanda.