Messi, Mbappé na Haaland bakomeje kwandika amateka mashya mu Gikombe cy’Isi 2026

Umunsi udasanzwe mu Gikombe cy’Isi cya 2026 wasize abakunzi b’umupira w’amaguru bishimiye igitaramo cy’abakinnyi batatu bakomeye ku isi: Lionel Messi, Kylian Mbappé na Erling Haaland, bose bagaragaje ubuhanga bwabo mu gutsinda ibitego by’ingenzi. Aba bakinnyi bakomeje kwerekana ko bashobora kuba ari bo bazavugwa cyane muri iri rushanwa, nyuma yo gufasha amakipe yabo kubona intsinzi no gukomeza urugendo rwo guhatanira igihembo cya Golden Boot gihabwa umukinnyi uzaba watsinze ibitego byinshi. Messi akomeje gukora amateka mu Gikombe cy’Isi. Kapiteni w’Ikipe y’Igihugu ya Argentina, Lionel Messi,

Umunsi udasanzwe mu Gikombe cy’Isi cya 2026 wasize abakunzi b’umupira w’amaguru bishimiye igitaramo cy’abakinnyi batatu bakomeye ku isi: Lionel Messi, Kylian Mbappé na Erling Haaland, bose bagaragaje ubuhanga bwabo mu gutsinda ibitego by’ingenzi. Aba bakinnyi bakomeje kwerekana ko bashobora kuba ari bo bazavugwa cyane muri iri rushanwa, nyuma yo gufasha amakipe yabo kubona intsinzi no gukomeza urugendo rwo guhatanira igihembo cya Golden Boot gihabwa umukinnyi uzaba watsinze ibitego byinshi. Messi akomeje gukora amateka mu Gikombe cy’Isi. Kapiteni w’Ikipe y’Igihugu ya Argentina, Lionel Messi, yongeye kwandika amateka ubwo yatsindaga ibitego bibiri mu mukino Argentina yatsinzemo Austria ibitego 2-0 wabereye i Dallas. Ibyo bitego byatumye Messi ashyiraho agahigo gashya, arenga Miroslav Klose wari usanzwe ufite amateka yo kuba umukinnyi watsinze ibitego byinshi mu mateka y’Igikombe cy’Isi. Umunya-Argentine yahise agira ibitego 18 mu mikino y’Igikombe cy’Isi, aba ari we uyoboye urutonde rw’abatsinze ibitego byinshi muri iri rushanwa. Messi kandi yerekanye ubudahangarwa bwe kuko nubwo yari yabanje guhusha penaliti, yaje kugaruka atsinda ibitego bibiri byafashije Argentina kubona intsinzi. Ubu amaze gutsinda ibitego bitanu muri iri rushanwa, akaba ari we umaze gutsindira Argentina ibitego byinshi kugeza ubu. Mbappé akomeje gukurikira Messi Nyuma y’uko Messi amaze gushyiraho amateka mashya, Kylian Mbappé na we yahise asubiza mu buryo bukomeye. Umunya-France, wari ukinnye umukino we wa 100 mu ikipe y’igihugu, yatsinze ibitego bibiri mu ntsinzi y’Ubufaransa bwatsinze Iraq ibitego 3-0. Ibyo bitego byatumye akomeza kwegera Messi mu rugamba rwo guhatanira kuba umukinnyi uzasoza iri rushanwa ari we ufite ibitego byinshi. Mbappé ubu afite ibitego bine muri iri rushanwa kandi akomeje kwerekana ko ari umwe mu bakinnyi bafite ubushobozi bwo gusiga amateka akomeye mu Gikombe cy’Isi. Erling Haaland na we ntiyashatse gusigara inyuma. Rutahizamu wa Norvège yatsinze ibitego bibiri mu mukino ikipe ye yatsinzemo Sénégal ibitego 3-2 i New York/New Jersey. Nyuma y’igice cya mbere kitamworoheye, aho ishoti rye ryagonze igiti cy’izamu ndetse n’umutwe we ugafatwa n’umunyezamu, Haaland yagarutse mu gice cya kabiri yerekana imbaraga ze maze atsinda ibitego bibiri byafashije Norvège kubona intsinzi. Umutoza wa Norvège, Ståle Solbakken, yashimye cyane rutahizamu we avuga ko ari umwe mu ba rutahizamu beza ku isi. Yagize ati: “Ni we rutahizamu mwiza. Nubwo adakinira amakipe afite amazina akomeye nka Argentina cyangwa Ubufaransa, ahora atsindira igihugu cye ibitego.” Kugeza ubu, Messi ayoboye abatsinze ibitego byinshi n’ibitego bitanu, mu gihe Mbappé na Haaland bafite ibitego bine buri umwe. Aba bakinnyi batatu bamaze gutsinda ibitego 13 hamwe muri iri rushanwa, ibintu bituma guhatanira igihembo cya Golden Boot kurushaho gukomera. Abakunzi b’umupira w’amaguru ku isi bakomeje gukurikira iri rushanwa ry’abakinnyi batatu bafite amazina akomeye, aho buri umwe ashaka gusiga amateka ye mu Gikombe cy’Isi cya 2026.