Women World Cup: Australia yabonye itike ya ⅛ mu mukino wari uwo gupfa no gukira

Ikipe y'Igihugu ya Australia mu mupira w'amaguru yabonye itike yo gukomeza muri ⅛ nyuma yo gutsinda Canada ibitego 4-0 mu mukino wa nyuma wo mu itsinda B mu Gikombe cy'Isi cy'abari n'abategarugori. Kuri uyu wa Mbere, tariki 31 Nyakanga 2023, ku isaha ya Saa Mbiri z'ijoro i Melbourne muri Australia, zikaba saa Sita ku isaha ya Kigali, muri sitade yitwa Melbourne Rectangular Stadium habereye umukino wa nyuma mu itsinda B wahuzaga ikipe y'igihugu ya Australia mu mupira w'amaguru na Canada. Abakinnyi babanjemo ku ruhande rwa Canada(4-3-3): Sheridan, Riviere, Buchanan, Gilles, Lawrence, Quinn, Flem

Ikipe y'Igihugu ya Australia mu mupira w'amaguru yabonye itike yo gukomeza muri ⅛ nyuma yo gutsinda Canada ibitego 4-0 mu mukino wa nyuma wo mu itsinda B mu Gikombe cy'Isi cy'abari n'abategarugori.

Kuri uyu wa Mbere, tariki 31 Nyakanga 2023, ku isaha ya Saa Mbiri z'ijoro i Melbourne muri Australia, zikaba saa Sita ku isaha ya Kigali, muri sitade yitwa Melbourne Rectangular Stadium habereye umukino wa nyuma mu itsinda B wahuzaga ikipe y'igihugu ya Australia mu mupira w'amaguru na Canada.

Abakinnyi babanjemo ku ruhande rwa Canada(4-3-3): Sheridan, Riviere, Buchanan, Gilles, Lawrence, Quinn, Fleming, Grosso, Leon, Sinclair na Huitema.

Ikipe y'Igihugu ya Australia yaherukaga gutsindwa na Nigeria ibitego bitatu kuri bibiri, yatangiye uyu mukino iri ku gitutu cyinshi kuko iyo itsindwa yari guhita isezererwa.

Ku munota wa 8 gusa w'umukino, Hayley Raso usanzwe ukina mu kibuga hagati yatsinze igitego cya mbere ku ruhande rwa Australia.

11 babajemo ku ruhande rwa Australia(4-4-1-1): Arnold, Carpenter, Hunt, Kennedy, Catley, Raso, Gorry, Cooney-Cross, Fowler, van Egmond na Foord.

Hayley Raso yishimira igitego.

Ikipe y'Igihugu ya Australia yakomezaga gushaka igitego, ku munota wa 34, Mary Fowler yatsinze igitego ariko umusifuzi arebye kuri VAR kirangwa.

Australia itacitse intege, ku munota wa 39 , Hayley Raso yatsinze igitego cya kabiri , ku ishoti yashoteye kure n'ukuguru ku ibumoso.

Mu gice cya kabiri cy'umukino , ku munota wa 58, Mary Fowler yatsinze igitego cya gatatu ku ruhande rwa Australia, ku mupira wari uzamukanwe na Caitlin Foord, akawumuha nawe akawuteresha ikirenge cy'ubumoso.

Ku munota wa 90+4' , Australia yatsinze igitego cya kane cyatinzwe na Steph Catley kuri penaliti.

Umukino warangiye ikipe y'igihugu ya Australia itsinze ibitego bine ku busa bwa Canada bituma ihita inabona itike ya ⅛ kuko yazamutse mu itsinda B ari iya mbere n'amanota 6, iya kabiri ikaba Nigeria yazamutse n'amanota 5 nyuma yo kunganya na Ireland ubusa ku busa.